Teatersjef ved Sogn og Fjordane Teater, Terje Lyngstad, snakka om kjærleik mellom Fritjov Nansen og kona, kjærleik mellom menneske av same kjønn og mellommenneskeleg kjærleik uansett kor ein kjem frå og kva hudfarge ein har under opningstala for dei 20. nynorske festspela på Ivar Aasen-tunet i Ørsta.
– Kjærleiken går som ein raud tråd gjennom årets festivalprogram, og ein betre dag for å opne Dei nynorske festspela finst vel ikkje. Ingen dag er meir knytt til kjærleiken enn Jonsokaftan, slo teatersjefen fast.
Han held vidare fram med å fortelje om andre kjærleikshistorier knytta til Jonsokaftan. Han nemnde mellom anna Shakespeare sin «Ein midsommernattsdraum», tradisjonen med jonsokbrudepar og kjærleiken mellom to menneske av same kjønn. Ei form for kjærleik som var forboden ved lov heilt fram til 1972.
– Tru det eller ei, det var natt til Jonsokaftan i 1977 at Kim Friele, den viktigaste homopolitiske talskvinna i Noreg, følgde sin store kjærleik, Wenche Lowsow, heim for første gong, begge to gryande forelska i kvarandre. Takk og pris for at dei finst, dei som torer å stå fram og vise veg, slo teatersjefen fast medan grå bålrøyk steig opp mot den regntunge himmelen på andre sida av Hovdebygda.
Under opningshøgtida fekk festspeldeltakarane også høyre festspeldiktar Bjørn Sortland lese ein nyskriven tekst, Lars Bremnes song om hurtigruta, unge deltakararar på Sortland sitt skrivekurs las eigne tekstar og bloggar Linda Sæbø mottok prisen som årets nynorskbrukar av styreleiar i Norsk kultursentrum, Reidar Sandal.
