LeLitt-festivalen i Nordhordland er i full gang, med 130 arrangement i åtte kommunar.
– Føremålet med festivalen er å vise det breie tilbodet til biblioteka, men også å setje fokus på den nynorske litteraturen, seier biblioteksjef i Osterøy, Bente Dammen.
Ho og biblioteket hennar har nett vore vert for ei figurteaterframsyning av Erna Osland si bok Sov søtt herr Spiss, som er eitt av om lag 30 arrangement som hennar bibliotek skal by på i løpet av festivalen. – Det var ei kjempefin framsyning. Og alt vi har av Osland vart utlånt etter førestellinga, smiler ho fornøgd. Neste store hending i Osterøy bibliotek er litterær lunsj med Arne Hjeltnes på fredag. Hjeltnes skal varte opp med sin romanfigur Ivar Nimme, medan Osterøy bygdekvinnelag skal stå for eit godt måltid mat.
(Meir under bildet!)
Også dei andre biblioteka i det som festivalen har vald å kalle Litteraturhusa i Nordhordland : NB8 har mykje spennande på tapetet i den veka som er att av festivalen. Sov søtt herr Spiss skal rundt til fleire bibliotek, det blir skrivekurs for vaksne, bokkafear og lesestunder. Biblioteka som er med i festivalen er i Lindås, Radøy, Fedje, Meland, Masfjorden, Austrheim, Modalen og Osterøy.
LeLitt-festivalen, som altså er ein lese- og litteraturfestival, markerer også avslutninga av prosjektet Nye tider – NyNorsk. Dammen har vore prosjektleiar i dei snart tre åra prosjektet har gått. Nye tider – NyNorsk er eit pilotprosjekt utvikla i samarbeid mellom biblioteka i Nordhordland og LNK, og Dammen har tru på at mange av tiltaka som har føregått desse tre åra kan setje varige spor etter seg. Mellom anna er ho svært nøgd med at biblioteka i dei åtte kommunane har kunne samla seg to gonger i året for å gå gjennom den nyaste nynorske litteraturen for vaksne og barn. Dette har vore så verdifullt for biblioteka at Dammen er sikker på at dei ønskjer å halde fram med det. Då kan hende med litteratur på båe målformer, vel og merke.
Prosjektet skal evaluerast når festivalen er ferdig og dei tilsette har fått tid til å la festivitasen søkke inn.
Meir om LeLittfestivalen finst på www.mittnordhordland.no
