I Aurland planlegg dei eit senter som skal fremje geitenæringa i Noreg.
Senteret, som nå er inne i sluttfasen av forprosjektet, er tenkt lokalisert til Sogn Jord- og Hagebruksskule.
Alt i 2009 starta arbeidet mot det som skal bli eit opplevingssenter som skal fremje geitenæringa i landet gjennom informasjon om geitehald og spennande opplevingar.
– Utforminga har vore ei utfordring i planprosessen, særleg det å få til ein god kombinasjon mellom opplevingsperspektivet for publikum og tilrettelegging for eit trygt og sunt dyrehald, seier prosjektleiar Arve Tokvam til Sogn Avis.
Han viser til at bygget er tenkt sett saman av to hovudelement. Den eine skal innehalda formidlingsdelen, der ein sentral del også vil vera å profilere dei aktive geitemiljøa både i nærområdet og elles, som ein vegvisar for folk til å få oppleva geitehald på nært hald ute på stølane og i kulturlandskapet. Det skal òg vere utstillingar om geitehald, både i fortid og nåtid, i tillegg til filmrom og auditorium, kafeteria og butikk.
I tillegg kjem fjøsdelen, der dei vitjande skal få oppleve geiter på nært hald, men ikkje gjennom direkte kontakt med alle dyra i senteret. – På grunn av smittefare er det strenge reglar som må følgjast, seier Tokvam.
Han fortel at arbeidet med planane for eit Norsk Geitesenter i Aurland, har vore gjort ut frå tankar om å få til eit samarbeid med Sogn Jord- og Hagebruksskule (SJH) omkring både utvikling og drift av senteret.
Det er ennå ikkje etablert eit formelt samarbeidsprosjekt mellom Norsk Geitesenter og SJH/Sogn og Fjordane fylkeskommune, fortel Sogn Avis, men det ligg eit ønske om å få dette til. Det er også Sogn og Fjordane fylkeskommune som er tomteeigar der senteret er tenkt plassert.
