Landsmøtet til Høgre vedtok søndag at det skal vere frivillig for elevar i ungdomsskulen å lære skriftleg nynorsk.
Forslaget stammar frå Unge Høgre og vart overraskande vedteke under innspurten på det tre dagar lange møtet.
Partileiar Erna Solberg og første nestleiar Jan Tore Sanner stemde mot, men andre nestleiar, rogalendingen Bent Høie som er busett i Bærum, stemde for å fjerne kravet om skriftleg sidemål.
Under eit landsmøte som hadde kompetansebygging i skulen som den eine av to hovudsaker, vart Solberg spurt om ikkje dette vedtaket inneber det stikk motsette, nemleg nedbygging.
– Det at eit fleirtal vil gjere skriftleg sidemål frivillig, tyder ikkje at elevane skal reservere seg mot dikt, litteratur og kunnskap om den nynorske kulturarven. Kravet om kunnskap fell ikkje bort, sa partileiaren.
Tidlegare har Høgre vedteke at skriftleg sidemål skal vere frivillig i vidaregåande, men no gjeld det også ungdomsskulen. (©NPK)
