Integrerings- og mangfaldsdirektoratet (Imdi) ber for første gong dei 48 minste kommunane her i landet om hjelp til å finne bustad til flyktningar som får opphaldsløyve i Noreg.
Talet på flyktningar som skal busetjast i kommunane neste år, er det høgaste sidan 1994. For første gong ber derfor Imdi – som har ansvaret for å finne ein stad å bu til alle dei som får opphaldsløyve i Noreg – alle kommunane i landet om å ta imot flyktningar. Dermed blir også dei 48 kommunane som til no ikkje har tatt imot flyktningar, rekna med, skriv Nationen.
Bakgrunnen for at desse kommunane ikkje har tatt imot flyktningar før, er at dei ikkje har kunna tilby gode nok introduksjonskurs.
Om lag 100 av 428 kommunar har sagt ja til å ta imot alle dei Imdi ber dei om å sørgje for husrom til neste år, mens 8 kommunar har sagt nei. Resten tar imot færre enn det Imdi ber om.
– Vi skal busetje 10.800 personar i 2014. Vi manglar framleis bustader til over 3.000 personar. Derfor går vi no ut med ei konkret oppmoding til dei resterande 48 kommunane òg, seier Bjørn Holden, assisterande direktør i Imdi. (©NPK)
