Kringkastingsringen delte i dag ut Kringkastingsprisen til politisk journalist i NRK Ingunn Solheim.
Ingunn Solheim er fødd i 1980 og kjem opphavleg frå Førde i Sogn og Fjordane. Ho har arbeidd fire år som politisk journalist i NRK og har også erfaring frå mellom anna TV2 Nyhetskanalen, Kanal 24 og Dagens Næringsliv.
– Ingunn Solheim er ein god representant for nynorsk i fjernsynet. Ho brukar ein normalisert nynorsk og har ein klår uttrykksmåte som gjer henne lett å forstå for alle. I haust har ho særleg utmerka seg i NRK 1 sine valsendingar. Solheim er alltid vel førebudd. Ho stiller klåre spørsmål og er ikkje redd for å gå tett på dei ho intervjuer. Ho tar også med seg nynorsken på Twitter, der følgjarane får jamlege oppdateringar frå arbeidet med valdekkinga i NRK, skriv juryen.
Dei legg også vekt på at Solheim er ein dyktig journalist med solid fagkompetanse, og har dekt krevjande og mykje sette saker for NRK. Ho har vore inne som nyhendeopplesar på Dagsrevyen, også der med klår og overbevisande språkbruk. Ho brukte også nynorsk då ho tidlegare var tilsett i TV2 Nyhetskanalen og i Kanal 24, og kan slik vise til konsekvent bruk av nynorsk over mange år.
– Det var utruleg kjekt å få høyre at eg har eit klart og forståeleg språk. Det er det eg i min jobb skal bruke språket til. Det har aldri vore noko alternativ til det å bruke nynorsk for meg. Eg trur språket heile tida må utvikle seg for å bli likt, forstått og brukt. Eg sender ein stor takk til NRK der det både blir sett stor pris på nynorsken og blir gjort eit målretta arbeid for å fram språket. Der er vi som nynorskbrukarar priviligerte, seier prisvinnaren sjølv.
Kringkastingsprisen blir kvart år delt ut til ei røyst i eteren som utmerkar seg med godt språk i radio eller fjernsyn og som på ein framifrå måte bruker nynorsk eller dialekt i det daglege arbeidet. Prisen er eit vakkert grafisk blad av kunstnaren Per Kleiva.
