Ingen andre stader i landet betalar folk så lite i kommunale avgifter og eigedomsskatt som i Rogaland. Aller billegast er det å bu i Sola.
Det viser ein oversikt NRK og Kommunal Rapport har laga. Oversikta byggjer på tal frå Kostra-databasen til Statistisk sentralbyrå (SSB), skriv Kommunal Rapport.
Sola toppar altså statistikken. Der betalar folk ingen eigedomsskatt og knapt 4.700 kroner i kommunale avgifter.
– Det er fullt mogleg å ha låge kommunale avgifter viss det er politisk vilje til det, men du må ha gode planar og ein strategi om at dei skal vera låge, seier Sola-ordførar Håkon Rege (H) til NRK.
Folk i Nordreisa i Troms er dei som må betala mest i kommunale avgifter. Her må folk ut med vel 20.000 kroner i kommunale avgifter og eigedomsskatt.
Frp-ordførar John Karlsen forklarer dei høge avgiftene på denne måten:
– Først fekk vi ein realnedgang i inntektene våre, så fekk vi brev frå staten om at vi ikkje hadde utnytta inntektspotensialet vårt. Det kunne resultera i at skjønsmidlane våre fall bort. Då var vi i ein situasjon der det anten måtte gå ut over dei svakaste, eller vi måtte innføra eigedomsskatt. Då var valet enkelt, seier han til NRK. (NPK)
