Fleire norske kommunar ønskjer å legge om behandlinga av demente etter ein nederlandsk modell ved å byggje landsbyar for demente.
Kommunane lèt seg inspirere av den nederlandske demenslandsbyen De Hogeweyk i Weesp utanfor Amsterdam, der alle bebuarane har langt framskriden demens. Her kan dei bevege seg fritt rundt i den 15 mål store landsbyen med bustader, kafear, butikk, hagar og ulike aktivitetsklubbar. Målet er at dei skal fortsette å leve mest mogleg som dei har gjort tidlegare i livet.
Bærum, Stavanger, Arendal og Oslo kommunar har allereie besøkt sjukeheimen. Tysdag gjorde helseminister Bent Høie (H) det same. Han meiner filosofien bak demenslandsbyen er i tråd med visjonen til regjeringa om at helse- og omsorgstenestene skal vere tilpassa den enkelte, skriv Kommunal Rapport.
– Her har vi mykje å lære, ikkje berre for demensomsorga, men for omsorgstenestene generelt. Det viktigaste er at det er fullt mogleg å kombinere sterk fagkunnskap med det at folk kan fortsette å leve sine vanlege liv, seier ministeren.
Bærum kommune har allereie valt tomt for det som skal bli Noregs første demenslandsby. I Stavanger greier dei ut spørsmålet, medan Arendal vurderer å byggje eit liknande tilbod. Oslo prøver i første omgang å legge om tenestene i eksisterande sjukeheimar med inspirasjon frå Nederland. (©NPK)
