– Dei digitale forteljingane er ein flott måte å presentere og gi liv til kulturminna rundt om i fylket.
Sist veke var kulturfolk i Sogn og Fjordane samla til kurs på Nordfjordeid. På dagsordenen sto blant anna ein storm i Gulen, ei gamal stampe frå Nordfjord, ei sjøbod i Vågsøy og eit gamalt fotografi i oval ramme.
14 representantar frå kommunar, institusjonar, frivillige lag og reiseliv fekk gjennom to dagar opplæring i dramaturgi og historieforteljing, formidling, skriveprosessar, bruk av lyd og bilete, nettpublisering og presentasjon av digitale forteljingar.
Resultata vil ein etter kvart finne på digitaltfortalt.no – Kulturrådet si satsing på digital formidling av kulturarv.
Sigrun Espe jobbar med digital kulturformidling i Sogn og Fjordane fylkeskommune og håper det kan bli fleire slike kurs og seminar i tida som kjem.
– Dei digitale forteljingane er ein flott måte å presentere og gi liv til kulturminna rundt om i fylket. Ei forteljing kan skape nye dimensjonar og vekke ny interesse, seier Espe til nettsidene til Sogn og Fjordane fylkeskommune.
Det er Sogn og Fjordane fylkeskommune i samarbeid med NCE Tourism og Eid kommune som inviterte til dette todagarskurset i digital historieforteljing. Målet med kurset var å lære å produsere digitale forteljingar om kulturarv og lokale kulturminne i Sogn og Fjordane.
