Lyrikaren og forfattaren Helge Torvund (60) er tildelt kulturprisen til Stavanger Aftenblad for 2011. Vinnaren er stemt fram av lesarane til avisa.
– Torvund fortener denne utmerkinga på bakgrunn av det han har gjort for poesien både i bokform og elektronisk. Han er diktlærar på nettet, har bidrege med tekst til Bjørn Eidsvåg og er elles ein aktiv Twitter-poet. I år er han også aktuell med den kritikarroste diktsamlinga «Alabama?», seier redaktør Tarald Aano til Aftenbladet.no.
Sjølv ser forfattaren på prisen som ein siger for poesien.
– Eg tenkjer at det er ikkje berre er meg, men poesien som er sett pris på. Eg har ei oppgåve å få poesien fram – og det gjer ein slik pris som dette, seier prisvinnaren.
Sidan debuten i 1977 har Torvund gjeve ut over tjue diktbøker. Han har også skrive barnebøker, fagbøker og gjendikta amerikanske lyrikk. Mange vil også kjenna han som diktlærar på nettstaden Diktkammeret på Dagbladet.no.
Helge Torvund er tidlegare heidra med fleire prisar for bøkene sine, mellom anna Nynorsk litteraturpris og Samlagsprisen.
Den 30. oktober feirar Samlaget at Helge Torvund rundar 60 år med eit litterært arrangement på Litteraturhuset i Oslo. Arrangementet er også ei markering av at Diktkammeret i Dagbladet i år er ti år. Jubileet blir markert med boka Diktkammeret som Helge Torvund og Maria Børja er redaktørar for. (NPK)
