Heim Nyhende Lagar film om mastestriden i Hardanger

Lagar film om mastestriden i Hardanger

– Eg synest ikkje det har kome godt nok fram kva mastestriden i Hardanger eigentleg handlar om, seier filmregissør Vigdis Nielsen. No lagar ho film om den omdiskuterte kraftutbygginga.

– Det blir ein personleg og kritisk film som handlar om demokrati og naturforvalting, seier Nielsen, som opphavleg kjem frå Ulvik, til Nynorsk pressekontor.

Ho er tilknytt filmselskapet Phantom Film i Stavanger og har tidlegare laga fleire prislønte filmar, mellom anna ein dokumentarfilm om sambygdingen Olav H. Hauge.

Tek pulsen på Hardanger

Sidan i fjor haust har ho arbeidd med å dokumentera striden om kraftmastene. I desse dagar er filmteamet hennar i Hardanger for å høyra korleis folk i lokalmiljøet reagerer på vedtaket til regjeringa.

– Folk er opprørte. Mange har arbeidd mot mastene i seks år både gjennom grunneigarlag og andre interesseorganisasjonar. I sommar fekk folk i Hardanger full støtte, men no verkar det som om folk ikkje lenger bry seg meir om Hardanger, seier Nielsen opprørt.

– Eit politisk spel

Ho meiner det er mykje som ikkje har kome fram i saka og opplever at ho får fleire spørsmål enn svar dess meir ho set seg inn i saka.

– Det kan verka som om det heile er eit energipolitisk spel, seier ho.

Nielsen meiner til dømes at det er mykje som ikkje samsvarar mellom dei vedtaka som er fatta og prosessane som førte fram til vedtaket.

– Lokaldemokratiet er til dømes sett totalt til side, hevdar Nielsen.

Vil stilla spørsmål

Med filmen ønskjer ho både å stilla spørsmål ved norsk energipolitikk og om lokaldemokratiet har utspelt si rolle.

– Det store spørsmålet for meg er om me må øydeleggja Noreg for å redda verda, seier Nielsen som er oppteken av å få folk til å tenkja over om naturen har ein eigen verdi.

Ho synest også det er litt provoserande når omsynet til turistane blir viktigare enn omsynet til dei fastbuande.

– Det vart hevda at turistane ikkje kjem til å sjå mastene frå fjorden, men naturen har også ein verdi for folk som bur i Hardanger. Fleire fjordarmar og svært mange stølar i alle kommunane blir berørte.

Nielsen veit ikkje når filmen kjem til å bli ferdig.

– Me vil følgja prosessen vidare. Dersom mastene blir bygde, kva konsekvensar vil det få for dei berørte bygdene? Det kan ta tid, men eg meiner det er ein viktig film å laga, seier Vigdis Nielsen. (©NPK)

NYNORSK INSPIRASJON

Tilbyr digitalt språkkurs for kommunetilsette

Øygarden kommune har utarbeidd eit digitalt språkkurs som handlar om grunnleggjande nynorsk grammatikk og oppgåver undervegs. Kurset er lagt inn i KS Læring. Deltakarane vert...

Klar med nynorskkurs for lærarar

Kurset er laga for at lærarar som skal bruka nynorsk og undervisa i nynorsk skal bli trygge nynorskbrukarar. På oppdrag frå Bergen kommune har Nynorskkommunane...

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

MEST LESE

Nynorsk rettskriving

Færre elevar har nynorsk som hovudmål

No har ein av ni elevar nynorsk som opplæringsmålform. Leiar ved Nynorsksenteret er ikkje overraska, men ser det òg i samanheng. 11,4 prosent av norske...

Nynorskkommunane støttar økonomisk likestilling for Det Norske Teatret

Styret i Nynorskkommunane – LNK stiller seg bak Tett gapet – aksjonen for å auka tilskotet til Det Norske Teatret. Nynorskteateret i hovudstaden manglar 30...
Språkrådet og språkdirektør Åse Wetås meiner den nye læreplanen kan svekkje den samla norskkompetansen til elevane. Foto: Moment Studio/Språkrådet

Undersøking: Nynorsken står svakt i lærarutdanninga

I ei undersøking går det fram at mange lærarstudentar kan fullføre studiet utan å bli vurderte i nynorsk. Over 70.000 elevar her i landet...

BankID også på nynorsk

I 20 år har BankID vore tilgjengeleg på bokmål og engelsk. No er nynorsk eit alternativ for dei som ønskjer det. Nyheita om at BankID...