Laurdag 19. februar blir det ei markering av at det no er liv i alle husa på Tusenårsstaden i Fjaler. Blant anna i Klokkargarden, som er Jakob Sande sin fødestad.
– Vi har teke eit spontant initiativ til ei markering av at no skjer det mykje i husa på Tusenårsstaden her i Fjaler: i det gamle kommunehuset, skulehuset og folkebadet og på Klokkargarden som er Jakob Sandes fødestad der du finn den ombygde løa, våningshuset og Bestefarsstaua. Nokre av husa har vore i bruk lenge, nokre rom er heilt nye og nokre er ikkje så ofte i bruk, seier Margrete Reisæter i Jakob Sande-selskapet i ei pressemelding.
Førstkomande laurdag blir det lys og aktivitet i alle hus og rom. Her blir det også program både for liten og stor.
I det gamle kommunehuset held dei tre kunstnarane; Karina Siegmund, Anne Lise Stenseth og David Zadig til. Dei vil alle ha opne studio, i «Studio Nova» vil det også vere kafe, film, poesi og musikk. I skulehuset vert det utstilling og i Badet internasjonal kafe ved volontørane, bokbyte og lan.
– Jakob Sande-selskapet har invitert fleire til å vere med, det vert verkstad for born som kan lage sin eiga jekt i miniformat og islendingen Steingrimur Eyfjord skal syne kunst og Iren Kleiven sel kort og anna, fortel Reisæter.
Det er kulturkontoret og Frivilligsentralen som saman med kunstanarane og Jakob Sande-selskapet står bak arrangementet.
