SV har fremja ei rekkje forslag i Stortinget som vil gjere den nye språklova betre for nynorsken. – SV tar ansvar for å rydde opp i lovteksten, seier ein nøgd Peder Lofnes Hauge, leiar i Noregs Mållag.
Den nye språklova tok til å gjelde 1. januar 2022. I føremålsparagrafen til lova blir det slått fast at det offentlege aktivt skal fremje nynorsk som det minst brukte av dei to norske skriftspråka. Då lova vart handsama i Stortinget i 2021, ynskte Noregs Mållag ei lov som var endå meir offensiv for nynorsken.
– Det er kjempebra at SV tar ansvar for å gjere lova så god for nynorsken som ho burde blitt i 2021. Det geniale her er at SV no fremjar dei same framlegga som Ap, SV og Sp stod saman om i førre periode. Desse bør opplagt bli vedtekne no som dei tre partia har fleirtal i Stortinget, seier Peder Lofnes Hauge i ei pressemelding frå Noregs Mållag.
Krav til nynorskkompetanse
Eitt av forslaga frå SV er at staten skal krevje at tilsette skal skrive nynorsk i arbeidet, og at fylkeskommunar kan krevje det same. SV vil også at Språkrådet skal føre tilsyn med korleis fylkeskommunane etterlever reglane i lova.
– Mållaget venta i over femten år på ei ny språklov. Til slutt vart ho vedteken eitt år for tidleg. Med det raudgrøne fleirtalet vi har hatt sidan stortingsvalet i 2021, ligg alt til rette for ei styrkt språklov no, seier Lofnes Hauge.
I tillegg vil SV også bøte på det som verkar som to arbeidsuhell frå departementet si side i lovteksten. Dette handlar om at sentrale statsorgan må skrive til regionale statsorgan på fleirtalsspråket i regionen, og om ei presisering av at kommunestyre og fylkesting sjølve har ansvar for gjere språkvedtak for kommunen eller fylkeskommunen.
Mållagsleiaren forventar støtte frå Arbeidarpartiet
– Etter at språklova vart vedteken i 2021, sa Anette Trettebergstuen til Norsk Tidend at Arbeidarpartiet kjem til å jobbe for ei betre lov om dei skulle kome i posisjon etter valet. No er dei i posisjon aleine og står fritt til å støtte dei framlegga dei sjølve meiner er best, seier Lofnes Hauge.
Han ventar at dei røystar for framlegga dei sjølve fremja i førre periode.
– Fleirtalet i Stortinget skal vere for desse endringane, så det einaste som kan hindre ei betre lov for nynorsken, er om Ap meiner annleis om dette i posisjon enn i opposisjon. Det vil forundre meg, seier mållagsleiaren.
