Kulturarbeidar og poet Ivar Orvedal arrangerer annakvart år ein musisk biennale i Måren, som er ei veglaus bygd i Høyanger med fem fastbuande.
Ivar Orvedal er i desse dagar i gang med å planleggje biennalen for 2011, den fjerde i rekka. Han fortel at ideen om ein biennale, altså ein festival som blir halde kvart anna år, opphavleg sprang ut frå ein annan visjon, nemleg å gjere småbruket hans og skulehuset i Måren om til kulturhage og kulturhus; «Kulturhagen i Måren». I 2001 bestemte Ivar Orvedal og musikar Karl Seglem seg for å skipe til eit kulturarrangement for interimsstyret for kulturhagen, og det vart ein slags uoffisiell biennale.
To år seinare syntest Seglem og Orvedal det var på tide å gjere det til ei open hending, og den første offisielle Måren-biennalen vart opna sommaren 2003 av Einar Førde. Sidan då har det blitt to biennalar til, så eit opphald i 2009, og no er Ivar Orvedal i gang med å søkje støtte for å sjå om det blir råd til å arrangere biennale til sommaren.
Alternativt
Førebels har ikkje Orvedal programmet klart, men han har ein visjon og ei meining om at kyrkja og kyrkjerommet skal få spele ei tematisk rolle, og eit ønskje om samarbeid med kyrkjene i kommunen. Arrangementet har alltid vore meir alternativt enn kommersielt, med musikk, litteratur og biletkunst i sentrum, fortel Orvedal, som også sjølv er poet. Kjende namn som trekk eit stort publikum, er ikkje noko poeng for Orvedal, sjølv om han hadde Knut Nærum som gjest eit år temaet for biennalen var teikneseriar.
– Vi vel kvalitet i staden for plakatnamn, seier Orvedal. – Hjå oss får publikum alt frå afrikansk folkemusikk til undergrunnsmusikk.
Og publikum likar det dei får. Orvedal fortel om tilbakemeldingar frå gjester som har fått kunstopplevingar dei ikkje er vane med, men som dei har sett stor pris på.
Teltliv
Biennalen har alle åra fått støtte frå fylke, kommune, næringsliv, Kulturrådet og andre statlege organisasjonar. I år ønskjer biennalen dessutan å samarbeide med andre kulturkrefter i og rundt Høyanger kommune for å få eit større publikum og større artistar. På det meste har biennalen hatt heile 50 utøvarar, men det meiner Orvedal nesten blir for stort.
Festivalområdet der biennalen finn stad, har sine avgrensingar, men Orvedal er ikkje redd for at det skal hindre folk i å kome. Skulehuset har plass til 10 elevar, men det er mogleg å få plass til 40 tilskodarar der. Og campingplass for teltturistar finst i nærleiken, det einaste overnattingstilbodet utanom private hus.
– Vi har ikkje hatt noko eige system for å telje kor mange gjester vi har ei slik helg, men ut frå billettinntektene har vi rekna oss fram til omlag 100 gjester kvar dag som kjem til Måren.
