Ungdom i kommunar som har hatt forsøk med stemmerett for 16-åringar har meir tru på at det nyttar å engasjere seg i politiske spørsmål enn ungdom i resten av landet.
Det kjem fram av Landsrådet for Norges barne- og ungdomsorganisasjoner sin Resultatrapport for 2012. Rapporten vart lagt fram på Barne- og ungdomstinget på Sundvollen på måndag, og her kjem det fram at ungdom frå forsøkskommunar med 16-årig stemmerett hevdar dei er meir interesserte i politikk, meir engasjerte i lokalpolitiske spørsmål, har meir tillit til politikarane og lokaldemokratiet og har større tru på at det er nokon vits å stemme enn ungdom som ikkje har hatt høve til å stemme då dei var 16.
– Stemmerett utfordrar ungdom til å setje seg inn i demokratiet og tenkje politisk om meiningane sine. Analysa vår viser at 16- og 17-åringane opplever at det å få stemme gjer dei meir politisk modne. Stemmerett er ikkje berre eit mål for politisk engasjement, men også eit verktøy for å skape politisk engasjement, seier leiar i LNU, Gunhild Grande Stærk i ei pressemelding.
Tal frå rapporten viser at viser også ungdom som fekk høve til å stemme er blitt meir positive til å innføre stemmerett for 16-åringar. I forsøkskommunane er 54 prosent av ungdommane for 16-årig stemmerett, medan 23 prosent er heilt uenig eller nokså uenig. Ser ein landet under eitt er berre 31 prosent for 16-årig stemmerett, medan 48 prosent er mot. Tala i rapporten er henta frå ei undersøking om skuleval gjort av Norsk samfunnsvitskapleg datateneste og Utdanningsdirektoratet.
