Universitetet i Oslo er langt unna krava i mållova om minst 25 prosent nynorsk. Berre 2 prosent av skjemaa ved UiO er på båe målformer og berre 4,3 prosent av innhaldet på uio.no er på nynorsk.
– Det er ikkje noko nytt at UiO bryt mållova. Vi er likevel veldig skuffa. Det er dumt for studentane at UiO ikkje oppfyller krava, og lover er jo til for å følgjast, seier Tina Fauskanger, leiar i Studentmållaget i Oslo til Universitas.
Den manglande oppfølginga av mållova ved UiO har vore ein gjengangar i mange år. Mållova krev at 25 prosent av trykksakene og nettsidene skal vere på nynorsk. Universitetet har sjølv laga ein tiltaksplan for nynorsk som seier at 10 prosent av innhaldet på nettstaden deira skal vere på nynorsk innan 2015. Sjølv om det kan vere eit oppnåeleg mål, er det likevel langt unna det mållova krev.
Universitetsdirektør Gunn-Elin Bjørneboe meiner resultatet som kom fram i denne nye undersøkinga ikkje er godt nok og forventar at det blir rydda snøgt opp i.
– Så lenge vi ikkje oppfyller krava i lova, kan ein ikkje vere fornøgd. Men eg er fornøgd med fokuset vi har på det, seier Bjørneboe til studentavisa.
