Det er i alt 165 av landets kommunar som har ein eller fleire elevar med nynorsk som hovudmål. I heile 107 av dei har talet på nynorskelevar gått ned det siste året, skriv Jærbladet på leiarplass.
I leiaren viser ein til at eit av måla med Språkåret 2013 er å skape større språkleg sjølvkjensle blant nynorskbrukarane, i tillegg til at fleire skal bli glade for at me har to språk.
– Det er to gode og nødvendige målsetningar. Nynorsk er nemleg på vikande front. Stadig færre skuleelevar har nynorsk som hovudmål. Tal frå Utdanningsdirektoratet viser at det nå er vel 77.000 elevar som har nynorsk som hovudmål, og det er 1400 færre enn for eitt år sidan. I løpet av dei siste fire åra har talet på nynorskelevar gått ned med seks prosent, skriv Jærbladet.
Leiaren peikar på at nynorsk som hovudmål blir også meir og meir eitt vestlandsfenomen. 89 prosent av alle nynorskelevane held til i dei fire fylka Rogaland, Hordaland, Møre og Romsdal og Sogn og Fjordane.
– Også i mange kommunar som definerer seg som nynorskkommunar er det tilbakegang.Det er i alt 165 av landets kommunar som har ein eller fleire elevar med nynorsk som hovudmål. I heile 107 av dei har talet på nynorskelevar gått ned det siste året.
Avisa rosar jærkommunane Time, Klepp og Hå der dei meiner nynorsken står sterkare enn mange andre stadar.
– Men det er ei fattig trøyst for dei som ønskjer at nynorsken skal verta sterkare så lenge tendensen til at fleire og fleire vel målforma vekk som hovudmål held fram.
