Berre ei av dei fem bøkene som er med i Leselystaksjonen er på nynorsk.
– Me har vore i dialog med Nynorsksenteret om dette, og var i utgangspunktet opne for to bøker på nynorsk i årets aksjon. Men me fann rett og slett ikkje to bøker som var gode nok, seier prosjektleiar Kathrine Wegge.
Bøkene som har vore med i Leselystaksjonen 2012 er : Hjernen av Espen Dietrichs og Eirik Newth, Trash av Andy Mulligan, En pingles dagbok av Jeff Kinney, Spøkelsene på Frostøy av Hilde Hagerup og Mitt bankande hjarta av Alf Kjetil Walgermo. I tillegg er det ei eiga bok for elevane med samisk som hovudmål.
Leselystaksjonen er den største aksjonen i den norske skulen for å fremje boka og lesegleden blant elevane. Neste år blir aksjonen truleg redusert i omfang, men skal likevel leve vidare i ei ny form.
Mesteparten av materiellet på nettsidene til aksjonen er også på bokmål, berre diploma som elevane får er konsekvent sett om til nynorsk. I følgje Wegge er det få spørsmål frå nynorskskulane om å få meir av materialet eller fleire bøker på nynorsk.
Nasjonalforeningen for folkehelsen gir også ut skulemateriell. Opplegget deira Petter Puls føreligg på begge målformer, det gjeld ikkje for kampanjen Hopp for hjertet.
– Når det gjeld aktivitetskampanjen Hopp for hjertet, som årleg bidrar til at over halvparten av elevane i 4.-7. klasse hoppar tau på skulen eit par veker om våren, så blir den gitt ut på bokmål. Nasjonalforeningen for folkehelsen er ein frivillig organisasjon og me finansierer denne aktiviteten, som me tilbyr gratis til skulene, med innsamla midler. I samband med hoppetaukonkurransen ser me det som viktigast å få spredd oppfordringa om aktivitet og sendt hoppetau til alle klassar som vil delta, seier informasjonssjef Randi Kiil. Ho legg også vekt at det er få spørsmål frå skulane om å få materialet på nynorsk.
Les meir om undervisningsmateriell og kampanjar som ikkje kjem på nynorsk i neste utgåve av LNK-avisa.
