Anne Marit Godal frå Leser søker bok blir leiar for det nye nettleksikonet Norsk nettleksikon.
Norsk nettleksikon er ein nyoppretta organisasjon, men sjølve leksikonet skal byggje på databasen til Store Norske Leksikon, Store medisinske leksikon og Norsk biografisk leksikon. Store Norske la ned arbeidet i 2010 på grunn av manglande finansiering.
– Store Norske har overdratt databasen sin til oss gratis, og leksikonet deira som ligg på nett, blir liggande, seier Anne Marit Godal. Ho er oppteken av å ta vare på dei 200 000 vekentlege brukarane leksikonet har i dag slik at ein ikkje mister desse. I praksis vil heller ikkje brukarane av dagens leksikon oppleve nokon pluseleg revolusjon av leksikonet frå ein dag til ein annan, meir ei langsam og gradvis tilnærming til det nye Norsk nettleksikon, seier Godal.
31,5 millionar
Organiseringa og finansieringa er derimot ny. Staben og styret er nye. og midlar til å drive kjem frå Fritt Ord, Sparebankstiftelsen DNB Nor og Norsk faglitterær forfatter- og oversetterforening, Til saman har desse gått inn med 31,5 millionar kroner, og det gir prosjektet drygt 10 millionar årleg i tre år å jobbe med. I tillegg sit Det Norske Videnskaps-Akademi, universiteta og Nasjonalbiblioteket i styret.
Fagleg
Store Norske Leksikon har operert med 40 fagansvarlege og 300 skribentar. Godal trur Norsk Nettleksikon vil organisere arbeidet noko annleis, men understrekar samstundes at det nok vil vere skilnad på korleis dette leksikonet vil jobbe i motsetnad til konkurrenten Wikipedia.
– Wikipedia er 100 % brukarstyrte, medan vi kjem til å ha ein fagstab.
Norsk nettleksikon sin database er på bokmål. Korleis ser Godal på tilbodet til nynorskbrukarane?
– Eg vil ta kontakt med styret i det nynorske Allkunne for å sjå korleis dei to leksikona kan utfylle kvarandre, seier den Anne Marit Godal, som tar til i den nye jobben 1. april i år.
