Rett nok har mange allereie nytta seg av moglegheita til å søkje elektronisk etter skrivemåtar og definisjonar via nettutgåva av dei to bøkene. Med appen Ordbøkene blir det endå enklare – med mobil og nettbrett innan rekkevidde i dei fleste situasjonar.
– Utvikling av appen er eit viktig steg i ei modernisering og tilgjengeleggjering av dei digitale delane av nettordbøkene, seier IT-direktør ved Universitetet i Bergen, Tore Burheim.
LES OGSÅ: Populære norske ordbøker i fare
Modernisering
Etter at Universitetet i Bergen tok over ansvaret for språksamlingane, var første steg å få ei forsvarleg driftsplattform, medan appen er andre steg, forklarer han.
– No startar arbeidet med ei meir grunnleggjande modernisering.
Bokmåls- og Nynorskordboka er svært populære. Hittil i år er det søkt meir enn 19,6 millionar gonger i ordbøkene.
Ordbøkene vert kontinuerleg oppdaterte med gjeldande rettskriving. Når ein slår opp på eit ord, finn ein definisjonar, brukseksempel, bøyingsopplysningar og informasjon om opphavet til orda.
LES OGSÅ: Snart ingen grunnar til å skrive feil
Tilgjengeleg i heile verda
– Det er avgjerande viktig for oss at informasjon om godt og korrekt norsk er enkelt tilgjengeleg for alle brukarar av norsk i Noreg og elles i verda. Når ordbøkene no kjem på fleire plattformer, kan vi nå endå fleire brukarar, seier språkdirektør Åse Wetås.
Dei to ordbøkene, som er eigde og vert utvikla av Universitetet i Bergen og Språkrådet i fellesskap, er opne og tilgjengelege for alle. Dei kom ut første gong i 1986.
Bokmålsordboka har rundt lag 65.000 oppslagsord, medan Nynorskordboka har 90.000.
LES OGSÅ: Nyord engasjerar i Norden
