Statistikk frå Helsedirektoratet viser at pasientar frå små kommunar kjem raskare heim frå sjukehus enn pasientar i større kommunar.
Samhandlingsreforma tredde i kraft 1. januar i år, mellom anna med det formål å gi kommunane fleire oppgåver og ressursar, og at helsetenester skal flyttast nærare der folk bur, skriv Nationen.
Tala frå Helsedirektoratet for første tertial 2012 viser at talet liggjedøgn for utskrivingsklare pasientar ved norske sjukehus er halvert, samanlikna med tal frå første tertial i fjor.
Vidare kjem det fram at kommunar med under 2000 innbyggjarar tar pasientane sine heim frå sjukhus eitt døgn tidlegare enn kommunar som har 50.000 innbyggjarar eller meir.
Nestleiar i helse- og omsorgskomiteen Kjersti Toppe (Sp) er ifølgje avisa ikkje overraska over dette, men synest likevel det er vanskeleg å konstatere at små kommunar er betre rusta for reforma.
– Det nyttar ikkje å berre ha tal på kor mange som dreg ut og inn av sjukehus, det som er interessant er å finne ut korleis helsetilbodet blir for pasientane. Kvar blir dei av når dei blir skrivne ut? spør Toppe, og etterlyser statistikk på dette, fortel Nationen. (©NPK)
