Den tiande Nynorskkonferansen er meir populær enn alle forgjengarane. Den har allereie over 170 påmelde frå heile landet.
– Vi har aldri sett på maken. Lærarar i barnehage og skule ser tydelegvis at Nynorskkonferansen kan hjelpe dei når dei kan lære vekk nynorsk, både som hovudmål og sidemål, seier Hjalmar Eiksund.
Han er høgskulelektor ved Nynorsksenteret (Nasjonalt senter for nynorsk i opplæringa), og det er han som har det administrative ansvaret for Nynorskkonferansen.
Dette er den tiande Nynorskkonferansen i rekkja, men interessa har aldri tidlegare vore så stor allereie to månader før.
– Det viser at nynorsk er eit evigaktuelt tema. Nynorsksenteret skal hjelpe lærarane med det som skil norsk skule frå alle andre – at vi lærer elevane opp i to standardar av det same nasjonalspråket. Det byr på ein del utfordringar i undervisinga, og på denne konferansen kan lærarane få mange gode tips, seier Eiksund.
Nynorskkonferansen er for lærarar på alle klassesteg, barnehagelærarar, skuleleiarar, lærarstudentar, skulebibliotekarar, oppvekstsjefar, lærarutdannarar og andre interesserte frå heile landet. Den skal vere i Bergen 21. og 22. oktober. Dei fleste foredraga og kursa er interessante for alle som på ein eller annan måte jobbar med å lære vekk nynorsk. Nokre av seminara er retta mot dei som jobbar i barnehage, og nokre for dei som jobbar i skulen. Nokre er først og fremst for dei som skal lære vekk nynorsk som sidemål.
– Vi har framleis ledige plassar, både på seminara og fellessesjonane. Vi håper endå fleire grip sjansen før påmeldingsfristen 15. september. Vi har mykje spanande å by på, seier Hjalmar Eiksund.
Les meir om konferansen på nynorsksenteret.no.
