Sparebankstiftinga går inn med 500.000 kroner til eit nytt senter for å utdanne nynorskjournalistar i Førde.
Firda Media arbeider for å etablere eit nynorsk avissenter i Førde. Onsdag kom dei eitt steg nærare målet då Sparebankstiftinga løyvde 500.000 kroner til prosjektet. I tillegg har Amedia gått inn med pengar og Firda Media har søkt Vinjefondet om støtte, skriv Firda.
Sjølv om senteret skal liggje i Førde, er meininga at det skal gagne alle nynorskaviser i landet gjennom rekruttering av journalistar. Målet til avissenteret er å ta imot dei første praktikantane hausten 2013. Då skal mediehuset på Øyrane stå ferdig oppussa med plass til lærekrefter og tre til fire praktikantar, skriv Firda.
– Vi har sett mot det NRK Nynorsk mediesenter i Førde har gjort, og vore i dialog med dei. Vi er einige om å dra vekslar på kvarandre for å få til ei vidare satsing mot nynorskrekruttering i media, seier redaktør Yngve Årdal i Firda.
Senteret skal i første omgang vere eit forprosjekt i eitt år, for å kunne vurdere grunnlaget for ei langsiktig etablering. (NPK)
