Satsar på nytt kulturbygg

I Vindafjord kommune håpar ein eit samla kulturbygg vil gi innbyggjarane betre kulturtenester.

– Det er veldig positivt at ein no kan samle kulturtenestene i eit hus. I dag er me spreidde rundt om i kommunen, no kan me derimot få meir ut av tenestene, og ikkje minst få til eit sterkare samarbeid med innbyggarane og dei frivillige kreftene, seier kulturleiar i Vindafjord kommune Eva Kalstveit.

Det er det 40 år gamle kulturhuset i Ølen som no skal byggast på. Her skal kulturskulen, vaksenopplæringa, biblioteket, kulturadministrasjonen i kommunen inn og ungdomsklubbleiar skal ha kontorplass her. Prislappen blir 23 millionar kroner.

– Det heile starta med at biblioteket vårt hadde behov for nye lokaler, då
passa det godt at me kunne få samla kulturtenestene i kulturhuset som i dag
er basert på frivillig drift og innsats. No skal kommunen samarbeide tettare med dei frivillige kreftene enn me har gjort før, seier Kalstveit.

Ramma på 23.millionar er sikra ved vedtak i formannskapet, og dermed er det gitt grønt lys for prosjektet. Går alt etter planen kjem det nye kulturbygget på plass i løpet av 2013. No blir det arbeidd med å tilpasse bygget til framtidas behov og arkitetktur.

– Dette er ein del av arbeidet med å bygge eit solid sentrum i kommunen i Ølen, kulturskulen skal sjølvsagt ha undervisning i alle bygdene, men det blir også viktig å ha ein felles arena. Og med våre små, kommunale rammer må me vere kreative når det kjem til samarbeid og sambruk av bygget, seier kulturleiaren.

Ho er ikkje i tvil om at satsinga på kultur er viktig.

– Kunst og kultur er sprengkraft, er til for alle og viktigare enn me trur. Og me er heldige, me har eit bibliotek der dei tilsette er både nytenkjande og kreative, og den populære kulturskulen vår har ventelister.
– Kva utfordringar vil de få framover?

– Eg trur det vil ta litt tid før me er så samkøyrte at me ser gevinstane av dette, men eg er viss på at resultatet blir bra. Me ser fram til å kome inn i dette nybygget.