Danskane blir stadig dårlegare i rettskriving, og det danske språkrådet trur sosiale medium har skulda.
Ei undersøking det danske språkrådet har gjort viser at danskane er monaleg dårlegare til å stave no enn for 30 år sidan, melder NRK i dag. Direktør Sabine Kirchmeier-Andersen i Dansk Sprognævn seier til Danmarks radio at vi forventar at folk i dag skal kunne handtere ulike kommunikasjonstypar og medium. Samstundes ser ein at desse verktøya legg avgrensingar på oss fordi vi berre har eit gitt tal teikn å bruke og tastatur utforma på spesielle måtar. Kirchmeier-Andersen peiker også på Facebook som eit medium kor det ikkje er forventa at ein skal skrive korrekt.
Professor Kjell Lars Berge i nordisk språk og litteratur ved Universitetet i Oslo er ifølgje NRK ikkje så samd med det danske språkrådet. Han meiner dette seier meir om det danske språket enn om bruken av sosiale medium, og meiner danskane heller bør sjå på det verkelege opphavet til problemet, nemleg den store kløfta mellom dansk skriftspråk og talespråk.
– Denne avstanden har blitt så stor at det er vanskeleg for folk å vite korleis orda blir stava. Og her har det skjedd dramatiske ting på to-tre generasjonar. Det var myje enklare å forstå ein danske på 1950-tallet, seier Kjell Lars Berge.
