Kjeldespråket og få nynorskjournalistar er mykje av grunnen til at det er vanskeleg for NRK å ha meir nynorsk i sin produksjon. Det sa kringkastingssjef Hans Tore Bjerkaas då han gjorde opp rekneskap for NRK under Dei nynorske festspela.
Berre omlag 7 prosent av journaliststudentane i dag er nynorskbrukarar, og det gjer rekrutteringa av nynorsksrpåklege tilsette vanskeleg, sa kringkastingssjefen. Men det største hinderet for meir nynorsk i NRK meinte han var kjeldespråket. Stadig fleire organisasjonar og institusjonar har profesjonelle informasjonsfolk som matar media med tekstar på bokmål som er haldne i det Bjerkaas kalla byråkratspråk. Kopla saman med kontinuerlege deadlinar og krav til hurtig produksjon blir det eit resultat som ikkje tener nynorsken.
Medietilsynet fører årleg tilsyn med NRK, og i ein nyleg framlagt rapport slår dei fast at NRK framleis ikkje leverer 25 prosent av sine sendingar på nynorsk. Dårlegast ut kjem barnekanalen NRK Super med berre 16 prosent av innhaldet på nynorsk. Berre radiokanalen P1 oppfyller krava med 26 prosent nynorsk.
NRK ønskjer no å gjere desse målingane på andre måter enn dei årlege, for i større grad å bruke desse som arbeidsreiskap undervegs. Målingane vil truleg skje oftare enn ein gong i året. Samstundes vil dei og auke til å omfatte NRK sine nettsider, kor ein per i dag ikkje målar delen nynorsk.
