Både departementa og resten av statsforvaltinga brukte meir nynorsk utover 2000-talet.
I fjor var 28 prosent av alle stortingsdokument på nynorsk. Det er ei dobling sidan år 2000, då berre 13 prosent av stortingsdokumenta kom på nynorsk, ifølgje Ottar Grepstad.
I 20 år har han arbeidd med å utvikla, samla og analysera statistikk som dokumenterer utbreiinga av språk. No er det heile samla i «Språkfakta 2015».
Kvar dag i 20 dagar blir eit nytt kapittel publisert på Aasentunet.no. I dag kan du læra meir om statleg språkbruk.
LES OGSÅ: Bryt mållova : Skriv for mykje nynorsk
Uviss målform
Både nynorsk- og bokmålsbrukarar har krav på å få offentlege skjema på eiga målform, uavhengig av kvar i landet dei bur og kva tenestemål kommunen har.
I år 2000 var berre litt over halvparten av offentlege skjema tilgjengelege på begge målformer. I 2013 vart delen auka til 78 prosent.
Prosentdelen av nynorskkommunar har halde seg stabil sidan 1970-talet. Per dags dato har 113 av 428 kommunar nynorsk som tenestemål. 158 har bokmål og 157 er språknøytrale.
«Der finst også kommunar der leiinga ikkje veit om dei er nynorskkommune eller ikkje,» skriv Grepstad.
Om lag fire av ti nynorskkommunar var misnøgde med den statlege oppfølginga av lov om målbruk i offentleg teneste av 1980, då dei vart spurde i 1981, 2006 og 2011. Likevel var det knapt nokon av kommunane som følgde opp med klage.
