Bent Høie og programkomiteen i Høgre vil at tilsette i staten skal sleppe å bruke nynorsk viss dei ikkje vil.
– Systemet i dag er tungvint. Eg synest at me i større grad skal respektere val av språkform, at me lærer å lese og forstå kvarandre sine målformer, i staden for å tvinge andre til å skrive den målforma me har valt, seier Bent Høie til nrk.no
No vil Høgre målbrukslova frå 1980 til livs, der står det at statlege organ skal svare på brev frå privatpersonar, firma og andre organisasjonar i den målforma som brevet kom i. I tillegg gir den kommunar og fylkeskommunar høve til å krevje ei viss målform av staten.
No meiner Høgre og Høie at dette er for tidkrevjande og ei ordning som ikkje er ein styrke for språket.
Leiar i Noregs Mållag og høgrepolitikar, Håvard Øvregård seier til NRK at han er sterkt usamd med Høie.
– Me har nynorsk og bokmål som to nasjonale språkformer her i landet. Det at staten nyttar begge to er heilt avgjerande for at nynorsk og bokmål blir oppretthaldne som nasjonale språk, seier han.
Les meir om saka i neste utgåve av LNK-avisa.
