Eigenmeldingsrett i inntil eitt år for tilsette i Mandal og tett oppfølging av den sjukmelde, førte til at sjukefråværet gjekk ned i kommunen.
Sjukefråværet for tilsette i Mandal kommune har vorte 25 prosent lågare samanlikna med 29 liknande kommunar som følgje av at tilsette sidan 2008 har fått sjukmelde seg sjølv og har fått tett oppfølging. Det viser ein ny studie.
Ti verksemder i Noreg, deriblant fleire kommunar, er no i gang med liknande prosjekt sett i gang av Arbeidsdepartementet, skriv Aftenposten.
Det såkalla «Tillitsprosjektet» i Mandal inneber at den sjukmelde kan justere kor mange prosent sjukmeld vedkommande skal vere ut frå eigne vurderingar. Samtidig er oppfølginga av den sjukmelde frå arbeidsgjevar meir intensiv og omfattande enn vanleg oppfølging etter avtalen om inkluderande arbeidsliv.
Isolert for Mandal sokk sjukefråværet med 18 prosent i perioden.
Forskar Arnstein Mykletun seier til avisa at han trur ein av nøklane til suksessen er at det berre er to partar i staden for tre som skal få den sjukmelde tilbake i jobb. Vanlegvis er også legen involvert i prosessen.
Legeforeininga seier at dei er positive til alle tiltak som reduserer sjukefråværet, men er usikker på om eitt års eigenmeldingsrett faktisk fører til det. (©NPK)
