Trøndelag Teater hanka inn tre prisar då Teater-Noreg heidra seg sjølv med utdeling av årets Heddaprisar søndag kveld.
Den gjeve prisen for årets beste mannlege hovudrolle gjekk til Ingar Helge Gimle for tolkinga av Willy Loman i «Ein handelsreisendes død» på Trøndelag Teater. Espen Klouman Høiner, som spelte Biff Loman, fekk prisen for beste mannlege birolle. Han blei heidra for denne rolla og for rolla som Ivar Zolen i «Bør Børson jr».
Trøndelag Teater stakk også av med prisen for beste kvinnelege birolle ved Kine Bendixen for rolla som Jackie Kennedy i «Prinsessedrama».
Gisken Armand fekk prisen for beste kvinnelege hovudrolle for rolla som Eg i «Eg forsvinn» av Arne Lygre på Nationaltheatret. Nationaltheatret stakk også av med prisen for beste regi. Han gjekk til Oskaras Korsunovas for regien på «Peer Gynt», som blei sett opp på biscena Torshovteatret.
Årets framsyning blei «Stalker» av den frie gruppa Verk Produksjoner.
Nynorskprisar
For årets vertskap for prisutdelinga, Det Norske Teatret, blei det nok ein litt skuffande kveld. Nynorskteatret var nominert til åtte prisar, men vann berre éin – prisen for beste barneforestilling for «Eg – Ik, Ich, I» av Oscar van Woensel i regi av Jonas Corell Petersen.
Samtidig med Heddaprisane blei også Aksel Waldemars minnepris delt ut til ein biletkunstnar og ein person som har gjort ein særleg innsats for nynorsk som scenespråk. I år gjekk prisane til biletkunstnar Peter Esdaile og forfattar Olaug Nilssen.
Heddaprisane blei i år delt ut for 16. gong. Prisen blir delt ut av ein fagjury, og gjeld førestellingar/prestasjonar i teatersesongen 2012/2013. Statuetten vinnarane får er laga av Nina Sundbye. (NPK)
