Byen får kulturprisen for å ta det offentlege ansvaret sitt for eit mangfaldig kulturliv på alvor.
Onsdag vart Trondheim kommune kåra til Noregs kulturkommune 2013 i samband med landskonferansen til Norsk kulturforum i Narvik. Fylkesmann i Østfold, Anne Enger, stod for prisutdelinga. Enger har leidd arbeidet med Kulturutredningen 2014.
Juryen skriv i grunngjevinga si at kommunen er flink til å ta ansvar for kulturlivet i byen. Eit godt og breitt kulturtilbod kjem ikkje av seg sjølve, men juryen meiner kommunen har skapt og bidrege til imponerande breidd og kvalitet i kulturlivet i byen.
– Trondheim kommune er eit døme dei andre store byane i Noreg kan følgje: Planmessig satsing på ein strategisk, langsiktig og inkluderande kulturpolitikk, heiter det.
Prisen vert delt ut av Norsk kulturforum og vart første gong delt ut i 1992. (©NPK)
