Tidlegare BT-journalist Njord V. Svendsen er uredd i sin journalistikk og i sine uttaler. Då han mottok kulturdepartementet sin nynorskpris for journalistar under festspela var han klar i si tale.
– Eg er ein prisvinnar som ikkje var journalist; eg var ein mellombels arbeidstakar. Derfor vil eg dele denne prisen med alle andre som har jobb utan jobb, sa prisvinnaren etter at juryleiar Gry Molvær hadde overrekt han prisen.
Han snakka vidare om å leve under press som «laus journalist», som ein som skriv nynorsk og som ein minoritet.
– Eg skriv nynorsk, som er ei av to jamstelte former i Noreg. Kall det grautmål, spynorsk eller sidemål. Kall det kva du vil. Eg skriv det eg vil, slo Svendsen fast.
Han slutta av med ein petit som han kalla ein slags «tidsdiagnose». Ein petit han skreiv like før han slutta som journalist i BT. Petiten spelte på ordet mål, der mellom anna sidemål, overordna mål, målretta og søksmål blei nemnde.
Vi har tidlegare skrive om prisvinnaren og kvifor han fekk prisen frå departementet. Det kan du lese her.
