For andre året på rad kjem Vangsgutane ut både som bok og julehefte.
I fjor blei dei tre første årgangane av serien samla i bokform for første gong. I år følgjer forlaget opp med band 2 som dekkjer årgangane 1943, 1944 og 1945.
– Desse vart skrivne og teikna i ei tid som vi kjenner som gullalderen i norsk teikneseriekunst. Dei fleste store klassikarane i norsk teikneseriekunst vart skapte i denne tida, skriv forlaget.
Teikneseriekjennaren Olav Norheim tek i innleiinga for seg serien i eit kulturhistorisk perspektiv. Han fortel om kva som kjenneteiknar serien, korleis han blei til og om teikneserieparallellar i inn- og utland.
Forlaget vil gje ut i alt fem band. Utgjevingane dekkjer årgangane til og med 1957 som kunstmålaren og teiknaren Jens R. Nilssen (1880– 1964) teikna.
Klassisk nytt
I tillegg til dei innbundne hefta, kjem det også i år ut eit eige julehefte om Vangsgutane. Her kan lesarane gle seg over ei nylaga forteljing lagt til krigsåra skriven av Sverre Årnes og teikna av Ivan Andreassen.
Trufaste lesarar får også sitt med to klassiske forteljingar skrivne av Leif Halse og teikna av Jens R. Nilssen. Forteljingane er henta frå 1950 og 1951.
Musikalsk hyllest
Musikaren og komponisten Henning Sommerro har skrive innleiinga til heftet. Han undrast på kvifor det ikkje er laga film og TV-serie om Vangsgutane. Sjølv har han både skrive musikk til eit eige fjernsynsprogram om serien og ei lita Vangsgutsuite for strykekvartett. (©NPK)
