Partiet Høgre ønskjer no at alle rektorar skal ha kontraktfesta resultatmål for skulen sin, melder Klassekampen.
Det kjem fram i førsteutkastet til stortingsvalprogrammet for 2013–2017. Dette er ein type kontraktar som allereie er mykje nytta i kommunar og på vidaregåande skolar.
– Vi har slått fast at vi ønskjer å følgje opp rektorane og skulane sine resultat tettare, men akkurat korleis kontraktane skal sjå ut, blir litt opp til kvar enkelt kommune, seier nestleiar Linda Hofstad Helleland i programkomiteen til avisa.
Helleland peikar til osloskulen som eit døme på korleis det kan gjerast. Her har alle skular resultatkontraktar, og desse kontraktane med rektor baserer seg på resultata skulen oppnådde året før.
Skulebyråd Torger Ødegaard (H) i Oslo kommune ser ikkje noko negativt med å ha kontraktfesta resultatmål og seier til avisa at dette spesielt kan gagne dei svakaste elevane.
Han peiker på at folk på venstresida ser ut til å meiner at skulen er bra nok som han er og at dei nøyer seg med ein skule tilpassa middelklassen fordi barn av middelklassen alltid greier seg.
– Dei har foreldre, søsken eller eit miljø som kan hjelpe til. Dei som ikkje har det er avhengige av at skolen følgjer med og følgjer opp, seier Ødegaard til avisa.
Magnus Marsdal i Manifets Analyse, forfattar av boka Kunnskapsbløffen, fryktar at forslaget til Høgre vil kaste dei vaksne ut i det han kallar ei egoistisk jakt på resultatmål.
– Når målstyring etter bestemte tal avgjer dei vaksne si løn, byrjar målingane å styre åtferda deira, i staden for barna sitt beste, seier Marsdal til Klassekampen.
