– Noregs Mållag bør droppe kravet om at alle skal kunne skrive to skriftlege variantar av norsk, skriv norsklektor Erling Petersen i Utdanningsnytt.
– Udir gir klåre signal om å styrke hovudmålet og nedprioritere den skriftlege sidemålsopplæringa. Skulekretsar etter skulekretsar går over til bokmål. Talet på bokmålsbrukarar på skular i tradisjonelle nynorskkommunar aukar. Nynorskungdommane vel i stor grad å byte hovudmål frå nynorsk til bokmål allereie i ungdomsskulen. Motstanden blant bokmålselevar når det kjem til sidemålsstilen er konstant og bastant. Sjølv trauste norsklektorar gir nå på mange måtar klårt uttrykk for at ein skriftspråksvariant er nok for elevar under opplæring, skriv Erling Petersen i Utdanningsnytt.
Petersen meiner Noregs Mållag bør droppe kravet om at alle skal kunne skrive to skriftlege variantar av norsk. Han meiner dobbeltskrivinga som språkpolitisk verkemiddel har spelt falitt.
– Samstundes må Noregs Mållag arbeide for å fjerne kravet om å byte skriftspråk i visse situasjonar. Begge ordningane rammer nynorsken. Den gamle parolen: Tal dialekt- skriv nynorsk, må skrivast om til: Tal dialekt- skriv den varianten du har lært. Alternativet for nynorsken sin del sluttar på «Amen», skriv Petersen.
