– Både elevar som har nynorsk som hovudmål og elevar med nynorsk som sidemål er tente med meir nynorsk, seier leiar i Noregs Mållag, Håvard B. Øvregård. Norskfaget er tema når Mållaget samlast til landsmøte i helga.
– Norskfaget er det viktigaste faget i skulen. Vi ser at det er store utfordringar. Mange elevar oppnår ikkje god nok kompetanse i nynorsk, og norsklærarane er under eit krevjande tids- og arbeidspress. Dette vil vi gjera noko med, seier Øvregård.
Han meiner likevel at elevar som har nynorsk som hovudmål og bokmålsbrukande elevar med nynorsk som sidemål har to ulike utfordringar når det gjeld norskfaget.
– Problemet for elevar som har nynorsk som hovudmål er at dei får for lite tekst på hovudmålet sitt. Det er difor mange elevar byter frå nynorsk til bokmål, meiner Øvregård.
Krev løft for sidemålet
Når det gjeld bokmålsbrukande elevar som har nynorsk som sidemål, meiner han at det største problemet er at elevane ikkje lærer nynorsk godt nok.
– Det er dette siste vi går mest inn i på landsmøtet. Vi vil ha eit løft for sidemålsopplæringa for dei med nynorsk som sidemål. Vi meiner at opplæringa i sidemål må starta tidlegare og at sidemålsopplæringa må inn i andre fag enn norsk, seier Øvregård.
Han synest det er interessant at stortingsrepresentant Olemic Thommesen (H) nyleg har teke til orde for det same.
– Kan læra meir
– Så løysinga er ikkje mindre sidemål for å letta presset i norskfaget?
– Vi meiner det er grovt feil når det blir hevda at sidemålsundervisninga går ut over norskfaget. Det finst nok av døme på at bokmålsbrukande elevar kan læra seg nynorsk som sidemål. Forslaget vårt viser korleis det er mogleg å gjera meir enn det elevane gjer i dag utan å bruka meir tid, seier Øvregård, som ønskjer seg eit nytt ordskifte om sidemålsundervisninga basert på kunnskap og forsking.
– Eg er trygg på at forsking vil visa at vi blir betre språkbrukarar av å læra både nynorsk og bokmål. Dei to norske skriftspråka er ein styrke, ikkje eit problem, seier Håvard B. Øvregård.
Til saman er rundt 170 personar påmelde til landsmøtet i Suldal i helga. Øvregård meiner det viser at det er stor interesse for målsaka. (©NPK)
