Folk frå by og land samla seg tysdag i Oslo for å demonstrera mot nedlegging av lokalsjukehusa rundt om i landet.
– Dette er «by og land hand i hand», seier Bente Øien Hauge, koordinator for Folkerørsla for lokalsjukehusa. Saman med rundt 70 demonstrantar frå Sogn og Fjordane hadde ho tysdag teke turen til hovudstaden for demonstrera mot nedlegging av lokalsjukehus saman med oslofolk og tilreisande demonstrantar frå andre plassar i landet.
– Vi vil synleggjera motstanden vår mot nedlegginga av lokalsjukehusa, som går føre seg over heile landet no. Viss sjukehus skal leggjast ned, så skal det skje gjennom demokratiske prosessar og demokratiske vedtak. No er det helseføretaka som styrer, seier Bente Øien Hauge til Nynorsk Pressekontor.
Ho var éin av dei som heldt appell utanfor Helsedepartementet.
– Det er fem år sidan folk frå heile landet samla seg til demonstrasjon for lokalsjukehusa og viste politikarane kva dei meinte. No er vi på plass igjen. Når så pass mange møter opp viser det at solidariteten ikkje er svekt, sa ho og retta kraftig mot sentrale politikar.
Nei til sjukehuskannibalisme
– Vi lèt oss ikkje lokka med på lokalsjukehuskannibalisme. Vi er solidariske. Lokalsjukehusa skal leva, oppmoda ho og heldt fram:
– Bodskapen vår er: Vi finn oss ikkje i at helseføretaka legg ned lokalsjukehusa. Vi finn oss ikkje i at dei tek frå oss den grunnleggjande tryggleiken vi er avhengige av. Vi finn oss ikkje i at helseføretaka lagar så luftige planar at dei til sjuande og sist må spara inn på pasientbehandlinga., sa Øien Hauge
Ho la til at ho ikkje venta at lokalsjukehusa skal utføra avanserte kirurgiske inngrep, men understreka at lokalsjukehuset er viktig både når mor skal føda, gamlemor har brote foten og i mange andre situasjonar.
– Gledeleg
Det var aksjonistgruppa for Aker sjukehus i Oslo som var ansvarleg for aksjonen. Dei sette tydeleg pris på støtta frå resten av landet. Tidlegare på dagen hadde leiar i Fagforbundet Aker Are Saastad møtt helseminister Anne-Grethe Strøm Erichsen (Ap).
– Vi er veldig glade for at vi fekk lov til å møta henne. Det er første gongen. Tidlegare har departementet og personar i det sentrale regjeringsapparatet vore totalt fråverande i denne saka, sa Saastad, som meinte det var lovande og gledeleg at så mange heldt fram å demonstrera sjølv om det er vedteke å leggja ned Aker sjukehus. (©NPK)
