Bokmålsskilt langs vegane i nynorskkommunar har vekt irritasjon. No får Statens vegvesen refs av Språkrådet.
Språkrådet er blitt gjort merksame på at Vegvesenet bruker bokmålsskilt i fleire nynorskkommunar på Vestlandet. I tillegg blir bokmål brukt i fleire kunngjeringar i Bergens Tidende, melder ABC Nyheter. Rådet har no teke affære og ber i eit skriv Statens vegvesen syte for å følgje mållova. Statens vegvesen region vest har nynorsk som tenestemål då nynorsk er fleirtalsforma i fylka som regionen dekkjer. Direktør Arnfinn Muruvik Vonen i Språkrådet bed Statens vegvesen om å leggje fram en tiltaksplan for bruk av nynorsk, samt å erstatte bokmålsskilta med skilt i rett målform.
– Me ventar at de no sørgjer for at lovverket blir etterlevt i organisasjonen, skriv språkdirektøren i brevet.
Statens vegvesen seier til ABC Nyheter at det er mangel på kunnskap og opplæring som er årsaka til dei språklege gleppa, men at det no skal setjast i verk opplæringstiltak. Skilta vil også bli erstatta, ifølgje seksjonsleiar Øyvind Haaland ved Statens vegvesen.
– Vi klarer ikkje å bytte ut alle med ein gong og må passe på at vi erstattar skilta samstundes som vi utfører andre tiltak på strekningane. Men i prinsippet er det ikkje akseptabelt at vi har skilt i region vest som er på feil målføre, seier Haaland.
