Hordaland fylkesutval går inn for at Hordaland fylkeskommune, Rogaland fylkeskommune og Sogn og Fjordane fylkeskommune går saman i ein ny folkevald region på Vestlandet.
Hordaland fylkesting skal handsama saka på møte 13.-14. desember.
På veg mot stor region
– Med dei vedtak og innstillingar som hittil er gjort i dei tre vestlandsfylka, er me komne lenger i prosessen mot ein Vestlandsregion enn me kunne håpa på då me starta, seier fylkesordførar Anne Gine Hestetun.
– Eg er optimist og har stor tru på at me er på god veg til at ein stor region på Vestlandet vert ein realitet, seier fylkesordførar Hestetun. I tillegg til den positive innstillinga frå Hordaland fylkesutval viser ho til vedtaka i Sogn og Fjordane fylkesting og Haugesund bystyre, som begge går inn for å samla Vestlandet i ein region.
Delt syn på alternative forhandlingar
I fylkesutvalet si innstilling heiter det at dersom dei to andre fylka ikkje går inn for etablering av ein Vestlandsregion, vil Hordaland ha drøftingar om alternative regionale løysingar både med Sogn og Fjordane og Rogaland. I drøftingar om samanslåing av Hordaland og Sogn og Fjordane vil det også verta opna for å invitera Møre og Romsdal inn i forhandling. Dette punktet vart tilrådd med 9 (Ap, Sp, KrF, MDG, V) mot 6 (H, FrP, SV) røyster.
Fylkesutvalet går med 13 mot 2 (FrP) røyster inn for at administrasjonsspråket i den nye Vestlandsregionen skal vera nynorsk.
Nei frå SV
Aud Karin Oen (SV) føreslo at fylkestinget skal seia nei til ein ny Vestlandsregion så lenge ein ikkje veit kva oppgåver som vert overført frå staten til regionnivået og kva oppgåver ein får behalda. Ho føreslo også at det skal vera folkerøysting om ein ny Vetlandsregion. Forslaget fekk SV si røyst.
