Eit stort fleirtal svarte i ei undersøking i samband med Ivar Aasens 200-årsjubileum at dei kjenner til diktaren og språkmannen. Dei fleste har også eit godt inntrykk av han.
Språkåret 2013 skal markerast fleire stader i landet gjennom heile året, og blir opna av kulturminister Hadia Tajik (Ap) i Kristiansand onsdag. MMI har i samband med dette undersøkt statusen til nynorskfaderen i det norske folk, 200 år etter at han blei født.
96 prosent av dei spurte svarte at dei kjenner til språkforskaren. 56 prosent har eit godt inntrykk av han, medan 7 prosent svarte at dei ikkje likar Ivar Aasen. Den sjølvlærte språkforskaren Ivar Aasen gav ut «Det norske Folkesprogs Grammatik» i 1848, og følgde opp med fleire ordbøker og lesebøker fram til 1870-talet.
– Eg trur at språkprosjektet til Ivar Aasen har hatt mykje å seie for at det norske samfunnet er så ope for språkleg mangfald, både når det gjeld minoritetsspråk, dialekt og nye innvandringsspråk, seier prosjektleiar Inger Johanne Sæterbakk i Språkåret 2013.
Hovudmålet deira er å vise fram at Noreg er eit mangfaldig, raust og inkluderande språksamfunn.
– Gjennom eit heilt år skal vi feire språk, diskutere språk og lære meir om den unike språksituasjonen her i landet, både nasjonalt og lokalt, seier prosjektleiaren. (NPK)
