Språkrådet er ikkje nøgd med nynorskprosenten ved NTNU og legg no press på universitetet for å få på plass ein tiltaksplan, skriv Under Dusken.
– Universitetet er store tekstprodusentar, og det er difor viktig at det kjem fram at me har to likestilte målformer i Noreg. Nynorsk er ein terminologi som står i fare for å forsvinne om den blir gjort usynleg, seier fagkoordinator Sigfrid Tvitekkja i Språkrådet til studentavisa.
Ho legg vekt på at dette i hovudsak handlar om studiekatalogar, heimesider og eksamensoppgåver.
Informasjonssjef Christian Fosse ved NTNU vedgår at universitetet må gjere nokre grep for å nå det lovpålagde kravet om 25 prosent nynorsk. Han viser til at ein no vil fokusere på å få inn meir nynorsk på heimesidene til universitetet, og at ein har investert i programmet Nyno som skal lette omsetjing frå bokmål til nynorsk.
