Kommunalminister Jan Tore Sanner (H) går tilbake på kravet om at samanslåtte kommunar må ha fleire enn 10.000 innbyggjarar for å få reformstøtte.
Regjeringa legg også bort forslaget om å avvikle fylkeskommunane. Det skal med andre ord vere tre forvaltingsnivå også etter at reforma er gjennomført.
Sanner slapp nyheita under ein debatt om kommunesamanslåingar, som vart halden under Arendalsuka fredag føremiddag.
Lagt fram i mai
Då Sanner presenterte rammene for kommunereforma i mai, var eitt av verkemidla for å stimulere til større kommunar å gje ei ekstra reformstøtte på mellom 5 og 30 millionar kroner til kommunar som fekk eit innbyggjartal på minst 10.000.
Men no snur Sanner som følgje av reaksjonane frå dei andre partia.
– Vi har lagt fram gode økonomiske verkemiddel. Eingongsstøtta ligg fast. I tillegg er det ei reformstøtte, der vi opphavleg meinte at det skulle gå til kommunar som etter ei samanslåing får 10.000 innbyggjarar. Stortinget har meint at det talet er for høgt, og då kjem eg sjølvsagt til å justere det, seier Sanner til NTB.
Fredar fylkeskommunen
Arbeiderpartiets Tore Hagebakken takka umiddelbart for avklaringa og spurde om det ikkje var noko meir dei kunne bli samde om.
Han sit i finanskomiteen for Ap, men var i kommunalkomiteen i førre stortingsperiode.
På spørsmål Sp-leiar Trygve Slagsvold Vedum om Sanner også kunne garantere at fylkeskommunane ikkje skal leggjast ned, kom det eit raskt «ja» frå statsråden.
– Høgre og Framstegspartiet har heile tida meint at det klarar seg med to nivå. Men når fleirtalet vil ha tre nivå, så tek regjeringa omsyn til det, sa Sanner.
– Når du har ei mindretalsregjering må ho ta omsyn til fleirtalet i Stortinget, seier Sanner til NTB.
Sentraliseringsfrykt
Vedum seier at han er uroa for at heile kommunereforma vil bli den største sentraliseringsreforma gjennom tidene.
– Vi veit at innbyggjarane i små kommunar er meir nøgde med tenestene enn innbyggjarar i større kommunar. Sanner var i debatten heilt klar på at det er på grunn av overføringsordningane. Eg meiner det er klare ord for pengane frå statsråden, seier Vedum til NTB.
Resultatet er sentralisering av innbyggjartenester som skule, helse og omsorg, meiner han. (©NPK)
