Riksantikvaren vil at fleire kommunar lagar kulturminneplanar. Dei siste åra har 189 kommunar fått støtte til å lage slike planar.
– Ein kulturminneplan er rett og slett eit godt arbeidsverktøy for kommunen. Gjennom arbeidet med planen aukar den lokale kompetansen, kulturminne vert sette på den politiske dagsorden og samarbeidet med lokalsamfunnet vert sterkare. Derfor har vi som mål at 90 prosent av alle kommunar skal ha ein kulturminneplan innan 2020, seier riksantikvar Jørn Holme.
Kulturminne for framtida
Ein kulturminneplan gir kunnskap om fortida og avklarer kva for kulturminne ein vil ta vare på i framtida. Med bakgrunn i ei oversikt over viktige kulturminne og kulturmiljø, utarbeider kommunen ein plan for forvaltninga av desse. Kommunane definerer sjølv kva for kulturminne som er verneverdige og som skal inngå i kulturminneplanen.
Sidan 2011 har 189 kommunar mottatt pengar til å utarbeide kulturminneplanar frå Riksantikvaren. Akershus, Hedmark, Oppland, Rogaland, Hordaland, Sogn og Fjordane, Møre og Romsdal og Troms er fylke som har tatt eit særleg grep om denne satsinga og der mange av kommunane er i gang med arbeidet. (©NPK)
