Naustdal kommune har meldt seg inn i LNK, og med det har organisasjonen no 123 medlemer. Det er rekord.
Naustdal kommune vedtok å melde seg inn i LNK i sommar. I saksutgreiinga blir det lagt vekt på at nynorskkommunen Naustdal har språk og språkstimulering som satsingsområde både i barnehagane og skulane i kommunen. Samstundes får kommunen tilbakemeldingar på at nynorsk ikkje alltid vert nytta konsekvent, og dei tilsette i kommunen ønskjer å styrke medvitet kring språk og rettskriving.
– Vi er med i LNK primært for å støtte arbeidet for å ta vare på og styrkje målforma vår, forklarar kulturleiar Ann Lisbeth Lesto i Naustdal.
Dagleg leiar i LNK, Vidar Høviskeland, seier det er svært gledeleg at kommunane ser verdien og nytta av å vere med i LNK.
– Dette inspirere oss til å utvikle nye tilbod som kan komma medlemene våre til gode, seier han.
