I dag lanserte Haugesenteret bok med ei rekkje ukjende og upubliserte tekstar av Olav H. Hauge.
«Olav H. Hauge og ‘Gamalt frå Ulvik’» er ei samling kortprosa, dikt, ord og uttrykk som er funne i kladdebøkene til Olav H. Hauge. Dei eldste tekstane er frå 1932, heile 14 år før han debuterte, då Hauge var 24 år gammal.
Forfattar Arne Skjerven meiner dette beviser at Hauge også skreiv dikt i løpet av den tyske okkupasjonen under andre verdskrigen. Korleis skulle han elles fått debutert med ei diktsamling i 1946, spør Skjerven.
I tillegg til dikt er det altså nye aforismar, eller stingord som Olav H. Hauge kalla dei, og ei ordsamling med i boka. Kladdebøkene inneheld også små soger og forteljingar frå Hardanger, rim og reglar og anna stoff, mellom anna mykje han har skrive ned etter mor si, Katrina Hauge, fortel Haugesenteret.
– Her er hundrevis av soger der me sit att med sjølve kjøtet, beinet og margen, ofte ei hending skriven i slåande kortform, seier Arne Skjerven.
Utgivarane har tileigna boka til Olav H. Hauge-senteret.
– Skjerven og Bergo har med raus hand stilt opp for Olav H. Hauge-senteret. No får vi endeleg gi noko attende ved å leggje til rette for denne bokutgivinga, seier fungerande dagleg leiar Ottar Grepstad ved Hauge-senteret.
I si tid kom 12 kladdebøker og ein del handskrivne lausblad frå Bodil Cappelen til Ulvik lokalhistoriske arkiv. Etter avtale med Ulvik lokalhistoriske arkiv overtok Olav H. Hauge-senteret i november 2011 ansvaret for kladdebøkene.
