I 2004 opna nynorskkommunen Nord-Fron opp for at enkelte tilsette likevel kan nytte bokmål dersom ein meistrar dette betre.
Nord-Fron innførde nynorsk som skulemål i alle krinsar i 1939 og som målform i kommuneadministrasjonen i 1965, i samband med den andre kommunesamanslåinga med Sør-Fron. I 1977 skilde dei to kommunane på nytt lag, og Nord-Fron stadfesta nynorsk som offisielt skriftspråk i administrasjonen. I 2004 opna likevel kommunen for at tilsette kunne bruke bokmål dersom ein meiner ein meistrar dette betre. Slik bruk kan i følgje målbruksplanen vere referat, notat, rapportar og saksframlegg. I tillegg kan det gjelde brev til innbyggjarar og andre der det ikkje er krav om ei bestemt målform.
– Det er heilt naturleg for oss å skrive nynorsk, sidan det ligg nærast opp til dialekten vår. Men eg ser jo at eit vedtak som dette fører til meir innslag på bokmål i administrasjonen, seier ordførar Tove Haugli.
Haugli meiner det er viktig å halde fast på dialekten og ikkje minst identiteten i kommunen. Ho ser samstundes at språket er i utvikling, og at bokmålet stadig vinn terreng, også i Nord-Fron. Ordføraren ser blant anna at ho snakkar ein mykje breiare dialekt enn det barna hennar gjer.
– Det er kjempeviktig å ta vare på dialekten vår. Og nynorsken. Språket er noko av den finaste kulturarven ein kan føre vidare, slår Haugli fast.
