Så langt har regjeringa løyvd 225 millionar kroner til dei elleve kommunane som har slått seg saman. Over 100 kommunar kan følgje etter, noko som vil utløyse omkring 2 milliardar kroner i støtte.
Nationens ordførarundersøking viser at éin av fire ordførarar trur det går mot samanslåing. Det betyr i så fall at ytterlegare 100 norske kommunar vil få støtte på same vilkår som dei elleve første.
– Det er ganske store kostnadar knytte til samanslåing. Det er så mykje det vil koste. Så den ambisjonen om å gjere alt dette på ein gong, det synest vi er ei meiningslaus bruk av ressursar, seier Senterparti-leiar Trygve Slagsvold Vedum til avisa.
Kommunalminister Jan Tore Sanner (H) ber Vedum følgje med i timen.
– Regjeringa fekk støtte frå eit breitt fleirtal i Stortinget for den økonomiske støtta til kommunar som går saman i juni 2014. Desse kommunane vil få god støtte og føreseieleg økonomi i mange år framover, seier Sanner.
Dei elleve kommunane som til no har slått seg saman, har fått 225 millionar kroner etter å ha søkt samanslåing tidleg i reformløpet. 10 millionar av dette er såkalla hurtigløpsstøtte, som kommunar som slår seg saman seinare ikkje vil få.
Til samanlikning er dei samla utgiftene i statsbudsjettet for 2016 berekna til rundt 1.246 milliardar kroner. (©NPK)
