Sogn og Fjordane feira torsdag at det vart eit eige fylke for nøyaktig 250 år sidan. Ei rekkje unge talent stod på scena for å feire fylket med ein stor kulturfest.
Fylkesordførar Åshild Kjelsnes ønskte velkomen til kulturfesten i Saften på Leikanger med å minne om at ungdom har hatt ein sentral plass i heile jubileumsåret.
– Vi har lagt stor vekt på å stimulere mange ulike tiltak og arrangement for og med ungdom. Mest av alt vil vi få fram den ungdommelege kreativiteten, engasjementet og dei flotte talenta vi har, sa Kjelsnes.
Blant dei unge talenta på scena var Line Dybedal Vederhus frå Selje og Jonas Nyløy Navarsete frå Sogndal. Sistnemnde har blitt kjent på YouTube for å syngje alle stemmene av Coldplay-songen «Living la vida» sjølv.
Av andre som stod på scena under kulturfesten var ASVO-bandet frå Årdal, Sirkus Smørdal, Drusar frå Jølster og Førde og dansegruppa In Motion frå Luster. Det var i tillegg eit internasjonalt innslag ved elevar frå United World College i Fjaler. Statsråd Liv Signe Navarsete var òg til stades på jubileet.
I tillegg blei det første amtkontoret på Nybø i Leikanger opna for publikum, etter å ha blitt flytta og restaurert. På 250-årsdagen for Sogn og Fjordane var det høgtidleg opning av bygget, med historieforteljing, avduking av informasjonstavle, song og musikk. (©NPK)
