Kanalvert Ragnhild Sælthun Fjørtoft er tildelt Kringkastingssjefens språkpris for 2010.
– Det er ei utruleg glede å få ei slik påskjønning for noko eg har jobba og med og vore oppteken av i så mange år, ja heilt liv faktisk. Det er godt å bli sett og høyrt, og verdsett for det ein gjer, sa ei glad Sælthun Fjørtoft. Ho poengerte vidare kor godt det er med ros, og oppfordra publikummet sitt, språkkontaktane i NRK, om å vere flinke til å rose medarbeidarane sine, sa vinnaren under utdelinga på Språkdagen i NRK.
– Med utgangspunkt i den frodige lærdalsdialekta uttrykkjer ho seg på eit vakkert, sobert og korrekt nynorsk, og ho har ei ega evne til å formidle ein bodskap slik at det når fram til folk. Med velvalde ord og formuleringar, god diksjon, og ein varm og personleg tone er ho dermed ein utmerka ambassadør for NRK og det norske språk, heiter det i grunngjevinga.
Det var 12 kandidatar til årets språkpris. Prisen var eit grafisk trykk av Nico Widerberg.
