28. mars inviterer Språkrådet til eit seminar om arbeidet med nynorsk i staten. På kurset blir det opplyst om kva Språkrådet kan hjelpe med og korleis andre etatar arbeider for meir og betre nynorsk.
Målgruppa for seminaret er statstilsette som arbeider med nynorsk, og som prøver å få til ei jamnare fordeling mellom målformene på arbeidsplassen sin. Formålet er å utveksle erfaringar og kome med tips om korleis ein kan få laga fleire og betre tekstar på nynorsk.– Vi vonar at seminaret også kan bli opptakt til eit kontakt- og diskusjonsforum for statstilsette som arbeider med nynorsk, skriv Språkrådet på nettsidene sine.
Språkråd-direktør Arnfinn Muruvik Vonen, seniorrådgjevarane Bjarne Myrstad i Fiskeri- og kystdepartementet og Hanne Bakke i Noregs vassdrags- og energidirektorat, samt rådgjevar Ellen Grong ved Universitetet i Bergen er blant dei som skal fortelje om sitt arbeid med nynorsk.
